पुण्यातील पाच वारसास्थळांसाठी दत्तक योजना

पुणे, 14 ऑगस्ट ।

देशातील वारसा स्थळांच्या संवर्धनासाठी केंद्रीय पुरातत्व खात्याने महत्वाची योजना आणली आहे. या अंतर्गत पुण्यातील पाच वारसास्थळे ही दत्तक दिली जाणार आहेत.

पुण्यात अनेक वारसास्थळे आहेत. यातील शनिवार वाडा हे सर्वांचे पर्यटनस्थळ आहे. मात्र, आता पुण्याचा ऐतिहासिक साक्षीदार असणारा हा वाडा दत्तक दिला जाणार आहे. या बाबत केंद्रीय पुरातत्व विभागाने निर्णय घेतला आहे. शनिवार वाड्यासोबतच पुण्यातील आगाखान पॅलेस, पाताळेश्वर लेण्या यासह पाच प्राचीन पुरातत्त्वस्थळे ही दत्तक दिली जाणार आहेत.

केंद्रीय पुरातत्व विभागाने देशभरातील प्राचीन स्मारके, पुरातत्त्व स्थळांच्या संवर्धनासासाठी पुढाकार घेतला आहे. यासाठी पुरातत्त्व विभागाने एक महत्वाकांशी योजना जाहीर केली आहे. 'अॅडॉप्ट अ हेरिटेज' असे या योजनेचे नाव या अंतर्गत देशातील नामांकित कंपन्या, स्वयंसेवी संस्था व वारसा स्थळांच्या सवर्धनासाठी कार्यरत संस्थांना या वास्तूंच्या देखभाल करता येणार आहे. केंद्रीय पुरातत्त्व विभागाच्या अखत्यारित तब्बल ३ हजार ६९६ वारसा स्थळे आहेत. यात प्राचीन स्मारके, मंदिरे आणि काही धार्मिक स्थळे व ऐतिहासिक आहेत. वारसास्थळ दत्तक योजनेत सुरुवातीला देशातील ६६ वारसा स्थळे ही विविध संस्थांना दत्तक दिली जाणार आहेत.

असा करता येणार अर्ज

वारसास्थळे दत्तक घेण्यासाठी दत्तक घेणाऱ्या संस्थांना पर्यटनाला चालना देण्यासाठी विविध सुविधा उपलब्ध करून द्यावा लागणार आहेत. दरम्यान, वारसा स्थळ दत्तक घेण्यासाठी संबंधित संस्था- कंपनी यांच्यासोबत दत्तक करारपत्र करावे लागणार आहे. या योजनेत सहभागी होण्यासाठी इच्छुकांनी www.asipermissionportal.gov.in या संकेत स्थळावर त्यांचे प्रस्थाव सादर करावे. यानंतर एक समिटी आलेल्या प्रस्तावाचे मूल्यांकन करून त्यांना मान्यता दिल्यावर पाच वर्षांचा करार संबंधित कंपनी अथवा संस्थेबरोबर करणार आहे.