नंदीग्राम एक्सप्रेसमधील मृत्यू प्रकरणात पाच जणांवर आत्महत्येचा गुन्हा दाखल

मुंबई,१३ ऑगस्ट : दादर रेल्वे स्थानकावर नंदीग्राम एक्स्प्रेसच्या शौचालयात ३५ वर्षीय बाबासाहेब साबळे यांचा मृतदेह सापडल्यानंतर मोठी खळबळ माजली होती. तपासात समोर आले की, साबळे यांनी आत्महत्या केली होती. या घटनेनंतर तीन दिवसांनी पोलिसांनी एका महिलेसह पाच जणांविरुद्ध आत्महत्येस प्रवृत्त केल्याप्रकरणी गुन्हा दाखल केला आहे.

साबळे घाटकोपरचे रहिवासी होते आणि काही दिवसांपूर्वी त्यांच्यावर एका महिलेने अश्लील चाळे केल्याचा आरोप केला होता. २१ जुलै रोजी असल्फा गावात साबळे नाला साफ करत असताना त्यांची लुंगी सुटल्यामुळे महिलेच्या लक्षात हे आले. महिलेला वाटले की साबळे अश्लील वर्तन करत आहेत, म्हणून तिने पोलिसांत तक्रार दिली. तक्रारीनंतर पोलिसांनी साबळेंविरुद्ध गुन्हा नोंदवला, ज्यामुळे ते अटक टाळण्यासाठी हिंगोली येथे पळून गेले.साबळेंच्या पत्नी सुनीता हिने आरोप केला आहे की, या खोट्या आरोपांमुळे आणि पोलिसांच्या सततच्या चौकशीमुळे साबळेंना मानसिक तणाव निर्माण झाला होता. सुनीताच्या मते, आरोपींनी वारंवार त्यांच्या घरी येऊन त्रास दिला, ज्यामध्ये शिवसेनेचे माजी नगरसेवक किरण लांडगे यांचाही समावेश होता. या सर्व घटनांमुळे साबळेंना मानसिक तणाव निर्माण झाला आणि त्यांनी नंदीग्राम एक्स्प्रेसच्या शौचालयात आत्महत्या केली.साबळेंच्या पत्नीच्या तक्रारीनुसार, पोलिसांनी रसिला चौहान, महेंद्र चौहान, संतोष चौहान, अंतेश चौहान, आणि किरण लांडगे यांच्याविरुद्ध आत्महत्येस प्रवृत्त केल्याचा गुन्हा दाखल केला आहे. या प्रकरणाची पुढील तपासणी सुरू आहे.